घर फर्काउँदै कार्यकर्ता, उत्साहित बन्दै मतदाता

दृष्टिकोण दैनिक सम्बाददाता

२ बर्ष अघि

२0७९ कार्तिक ५ शनिबार

घर फर्काउँदै कार्यकर्ता, उत्साहित बन्दै मतदाता

दार्चुला ।नेकपा एमालेका पोलिटव्यूरो सदस्य एवं प्रतिनिधिसभा उम्मेदवार गणेशसिह ठगुन्ना प्रदेशसभा २ का उम्मेदवार रामदत्त जोशी नेतृत्वको टोली तीन दिन अपिहिमाल गाउँपालिकामा बिताएर फर्कियो । अपिहिमाल गाउँपालिकाका सबै वडा पुगेर फर्किएको टोली उत्साहित भएर फर्किएको छ । 
स्थानीय तहमा पराजय भोगेका कारण पनि यो पटक एमालेको नेतृत्व गाउँ पुगेपछि निराश भएका कार्यकर्तामा उर्जा थपिएको छ । गत वैशाखमा सम्पन्न स्थानीय तह निर्वाचनमा एमालेले पराजय भोगेको बदला प्रदेश र संघीय निर्वाचनमा एमाले उम्मेदवारलाई विजयी गराउने गरि कार्यकर्ता परिचालनको नीति बनाइएको छ, एमाले प्रदेश कमिटी सदस्य धर्मानन्द मन्यालले भन्नुभयो, उम्मेदवारहरुको उपस्थितिले कार्यकर्तामा थप उत्साह थपिएको छ ।
उम्मेदवार गाउँ पुगेपछि एमालेबाट अलग भएर गएका अपिहिमाल गाउँपालिका २ का भुरी धामी घर फर्किनुभएको छ । ०७४ को स्थानीय निर्वाचनमा वडा कमिटी सदस्यमा निर्वाचित धामी एमाले जिताउने संकल्प लिएर घर फर्किनुभएको हो । यस्तै काग्रेसका क्रियाशिल सदस्य चन्द्रसिह लोथ्याल र गोरे धामी नेकपा एमालेमा प्रवेश गर्नुभएको छ । उनीहरुलाई प्रतिनिधिसभा उम्मेदवार ठगुन्नाले टिका लगाएर प्रवेश गराउनुभयो । 
पूर्व मन्त्री समेत रहनुभएका ठगुन्नाले एमालेमात्र सर्वहारा गरिब जनताको पार्टी भएको भन्दै सबैको उचित मूल्यांकलन एमालेले गर्ने बताउनुभयो । यो विशाल पार्टी हो । कार्यक्षमाताका आधारमा हामी उचित जिम्मेवारी दिन्छौ ।
अपिहिमाल गाउँपालिकामा हाम्रो पार्टीको नेतृत्व हुँदा थुप्रै विकास भएका छन् । सबैले देख्ने गरी सिद्धमकरीकोट पदमार्ग हामीले बनायौँ । पर्यटन मन्त्रालयबाट बजेट विनियोजनदेखि निर्वतमान अध्यक्ष धर्मानन्द मन्यालको भिजनका कारण यो पदमार्ग सबैको लागि आकर्षक बनेको छ । एकल पुरुषलाई सामाजिक सुरक्षा भत्तादेखि सबै वडा कार्यालय भवन प्रशासकीय भवन, हिलोमुक्त लगायतका आकर्षक कार्यक्रम एमालेले ल्यायो । सबै घरधुरीका ग्याँस वितरण हाम्रा कार्यक्रमभित्र पर्दछन् । 
ठगुन्नाले भन्नुभयो, विटुले पारिबगर हुदै खण्डेश्वरी जोड्ने सडक अहिलेसम्म यहाँ पुगिसक्थ्यो, । तर ठेकेदारले समयमै काम नगरिदिदा केही ढिलाई भयो । हामी यो सडक चाडै गाउँपालिकामा पुर्याउँछौ । मकरीगाडमा हाइड्रोपावर निर्माण अन्तिम चरणमा पुगेको छ । यो क्षेत्रको पर्यटन विकासको लागि अझै हामी काम गर्छौ उहाँको भनाई छ । 
अहिले प्रदेश  र संघीय निर्वाचन भएको कारण दार्चुलाको समग्र विकासको लागि नेकपा एमालेका उम्मेदवार जिताउन अपिल गर्छौ उहाँले भन्नुभयो । अहिले कोही निराश हुनुपर्ने अवस्था छैन् । विकासको लागि एमालेसँग प्रतिस्पर्धा गर्न सक्ने अरु कुनै दल छैनन् । एमालेभित्र अझै कार्यकर्ता र जनताको भावना बुझ्न सक्ने क्षमता रहेको भन्दै मत दिएर जिताउन उहाँले अपिहिमालबासीमा आग्रह गर्नुभयो ।
यस्तै प्रदेशसभा १ का उम्मेदवार हरदेव जोशी नेतृत्वको टोली दुहुँ गाउँपालिका वडा नम्बर ३ को खेती गाउँ हुँदै महाकाली नगरपालिकाको छापरी, सेलामा भेटघाट गरेको छ । महाकाली नगरपालिका भेटघाटपछि टोली लेकम मालिकार्जुन क्षेत्रमा भेटघाटमा जाने कार्यक्रम तय भएको छ । 
नेकपा एमाले सुदूरपश्चिम प्रदेशसभा समानुपातिक उम्मेदवार दीपा बुढाथोकी नेतृत्वको टोली नौगाड प्रस्थान गरेको छ । नौगाडको होपरीमा मतदाता भेटघाट कार्यक्रम तय भएको एमाले जिल्ला कमिटी उपाध्यक्ष चरनसिह बुढाथोकीले जानकारी दिुनभयो । 
यसैबीच नेकपा एमालेले मालिकार्जुन गाउँपालिका वडा नम्बर ३ र वडा नम्बर ८ मा निर्वाचन परिचालन कमिटी गठन भएको छ । कार्यक्रममा प्रदेश कमिटी सदस्य मोहनसिह धामी, तिलकसिह धामी लगायतको सहभागिता रहेको थियो । दुहुँ  गाउँपलिका वडा नम्बर २ मा जमनसिह बडालको अध्यक्षतामा निर्वाचन परिचालन कमिटी गठन भएको छ । वडा नम्बर ३ मा नेकपा एमालेको वडा कमिटी बैठक सम्पन्न भएको छ ।
लेकम गाउँपालिकाका सबै वडाहरुमा निर्वाचन परिचालन कमिटी गठन गरि उनीहरुलाई निर्वाचन परिचालनबारे जानकारीदिने काम भएको प्रदेश कमिटी सदस्य इन्द्रसिह विष्टले बताउनुभयो । 

 


थप समाचार

समाचार