कक्षा १२ को नतिजा प्रकाशित

दृष्टिकोण दैनिक सम्बाददाता

६ बर्ष अघि

२0७५ श्रावण १७ बिहीबार

कक्षा १२ को नतिजा प्रकाशित

दृष्टीकाेण समाचार, साउन १७ दार्चुला ।  राष्ट्रिय परीक्षा बोर्डले बिहिबार कक्षा १२ को नतिजा प्रकाशित गरेको छ । पहिलोपटक ग्रेडिङ प्रणाली (अक्षराङ्कन पद्धति) अनुसार नतिजा सार्वजनिक गरेको हो ।
गत बैशाख १४ देखि २७ गते सम्म संचालित परीक्षामा कुल ४ लाख १७ हजार ८९ जना परीक्षार्थी सम्मिलित थिए । नियमिततर्फ भने २ लाख ९९ हजार ६ सय ७५ विद्यार्थी सहभागी थिए । जसमध्ये ३.६१ देखि ४.० जीपीए प्राप्त गर्ने विद्यार्थीको संख्या १ हजार १ सय ६९ जना रहेको छ । सबैभन्दा बढी मध्यम स्तरको जीपीए २.१ देखि २.४० ल्याउने परीक्षार्थीको संख्या ९० हजार २ सय ९९ रहेको छ ।

सबैभन्दा थोरै १ सय ९९ जना विद्यार्थीले ०.०० देखि ०.८० जीपीए ल्याएका छन् । ३.२१ देखि ३.६० जीपीए प्राप्त गर्ने विद्यार्थीको संख्या ११ हजार २ सय २१ जना रहेको बोर्डले जनाएको छ । २.८१ देखि ३.२० जीपीए २७ हजार ६ सय ४३ जना विद्यार्थीले ल्याएका छन् । ५८ हजार ३ सय ४५ जना विद्यार्थीले २.४१ देखि २.८० जीपीए प्राप्त गरेका हुन् । १.६१ देखि २.०० जीपीए ल्याउने परीक्षार्थीको संख्या २२ हजार ७ सय ३४ जना रहेको छ । ०.८१ देखि १.२० जीपीए ४ हजार ४ सय ८७ जनाले प्राप्त गरेका छन् । ९ वटा जीपीए रेन्जमा नतिजा प्रकाशन गरिएको हो । कुल परीक्षार्थी मध्ये १७ हजार ४० जना विभिन्न कारणले परीक्षामा अनुपस्थित देखिएकाले कुल जीपीएमा नजिता प्रकाशन भएको छैन । आशिंकतर्फ ३५ दशमलव २ प्रतिशत उत्तीर्ण भएका छन् । परीक्षामा सहभागी १ लाख १७ हजार ४ सय १४ मध्ये ४१ हजार ३ सय २५ उत्तीर्ण भएको परीक्षा बोर्डले जनाएको छ । परीक्षा सकिएको ८१ औं दिनमा नतिजा सार्वजनिक भएको हो । यो वर्ष पहिलोपटक कक्षा १२ का सबै समूहको नतिजा एकैपटक प्रकाशित गरिएको बार्डका सदस्य सचिव दुर्गाप्रसाद अर्यालले जानकारी दिए । एउटा विषयमा डी प्लस वा त्यो भन्दा तल आएमा ग्रेड बृद्धिको परीक्षा दिन सक्ने छन् उक्त परीक्षा भाद्र १६ मा हुनेछ । नतिजामा चित्त नबुझेमा पुनर्योग र उत्तरपुस्तिका हेर्न सकिन ब्यवस्था समेत मिलाएको बोर्डले जनाएको छ । जसका लागि बिषय अनुसार बोर्डमा आवेदन दिनुपर्नेछ । प्रत्येक विषयका सैद्धान्तिक र प्रयोगात्मक परीक्षामा सी, सी प्लस, बी, बी प्लस, ए र ए प्लस ग्रेड प्राप्त गर्ने परीक्षार्थीले नतिजा सार्वजनिक भएको २१ दिनपछि ट्रान्सक्रिप्ट, माइग्रेसन र प्रोभिजनल प्रमाणपत्र पाउनेछन् । डी प्लस प्राप्त गरेका विद्यार्थीले भने ग्रेडवृद्धि परीक्षामा सहभागी नहुने अवस्थामामात्र प्रमाणपत्र पाउने बोर्डका अध्यक्ष चन्द्रमणि पौडेलले बताए । पुर्नयोगका लागि भदौ १ गते भित्र निवेदन दिनुपर्नेछ ।

नतिजा results.ekantipur.com लग इन गरेर नतिजा हेर्न सकिने छ। यस बाहेक एसएमएसबाट नतिजा प्राप्त गर्न सकिने छ। यसका लागि results (Space) Symbol number टाइप गरी३५००१ मा पठाउन सकिनेछ।


थप समाचार

समाचार